ڕاگەیاندنەکان
ئاگاداریی لە دەستەی نووسەرانەوە:
پێوەرەکان بۆ دوورکەوتنەوە لە ڕەتکردنەوەی دەستبەجێ (Desk Rejection)
بەمەبەستی پاراستنی بەرزترین ئاستی دەسپاکی و ڕەسەنایەتیی ئەکادیمی پرۆسەی هەڵسەنگاندن، دەستەی نووسەرانی گۆڤاری زانکۆ بۆ زانستە مرۆڤایەتییەکان پشکنینی سەرەتایی بۆ توێژینەوەکان جێبەجێ دەکات.
گۆڤاری زانکۆ هیچ توێژینەوەیەک وەرناگرێت، پێداچوونەوەی بۆ ناکات و بڵاوی ناکاتەوە کە نەتوانێت ئەو مەرجە بنەڕەتییانەی خوارەوە بەدیبهێنێت. پابەند نەبوون بەم پێوەرانە دەبێتة هۆی ڕەتکردنەوەی دەستبەجێ لەلایەن سەرنووسەرەوە و ئەندامانی دەستەی نووسەرانەوە (Desk Rejection) بەبێ ئەوەی بابەتەکە بنێردرێت بۆ پرۆسەی هەڵسەنگاندنی زانستی.
١. پابەندبوون بە ڕێنمایییەکانی گۆڤار
پێویستە توێژینەوەکە بە تەواوی پابەندی قاڵب (Template)، شێوازی ڕێکخستنی لاپەڕەکان، جۆر و قەبارەی فۆنت، و شێوازی سەرچاوەگرتنی فەرمیی گۆڤاری زانکۆ بێت. ئەو توێژینەوانەی کە زانیارییە سەرەتاییەکانیان (Metadata) ناتەواوە، یان لیستی سەرچاوەکانیان بە شێوازێکی نادروست ڕێکخراوە، یان بەشە پێویستەکانی پێکهاتەی توێژینەوەکەیان تێدا نییە، دەستبەجێ ڕەتدەکرێنەوە.
٢. ڕەسەنایەتی و نوێکاری
هەر توێژینەوەیەک پێشکەش دەکرێت، دەبێت تێڕوانین و دۆزینەوەی داهێنەرانە و نوێ لەخۆبگرێت بە شێوەیەک کە هاوکار بێت لە پێشخستنی زانستە مرۆییەکاندا.
٣. دووبارەنەبوونەوەی توێژینەوە (Duplicate Studies)
گۆڤارەکە خاوەنی سیاسەتێکی توندە دژی بڵاوکردنەوەی بابەت و توێژینەوەی دووبارە. هەر توێژینەوەیەک بسەلمێنرێت کە دەق یان بیرۆکەی تێدایە کە لە کارەکانی پێشووترەوە کۆپیکراوە (تەنانەت ئەگەر توێژینەوەی پێشووی خودی نووسەرەکەش بێت) بەبێ ئاماژەپێدان و سەرچاوەگرتنی زانستیی بێگەرد، ئەوا ڕەتدەکرێتەوە. سەرجەم بابەتە پێشکەشکراوەکان لە ڕێگەی نەرمەکاڵای تایبەتەوە پشکنینی ڕێژەی هاوشێوەییان (Similarity Check) بۆ دەکرێت. لەگەڵ لیستی توێژینەوەکانی تری گۆڤاری زانکۆ بەراورد دەکرێت.
٤. ئاستی بەرزی زمان و پێکهاتەی ئەکادیمی
پێویستە توێژینەوەکە پەیڕەوی لە پێکهاتەیەکی ئەکادیمیی لۆژیکی و یەکگرتوو بکات. بەبێ گوێدانە جۆری زمانەکە (کوردی، عەرەبی، یان ئینگلیزی)، دەبێت داڕشتنەکەی ورد، ڕوون و بێبەش بێت لە هەڵەی ڕێزمانیی گەورە یان دەستەواژەی ناڕوون و تەمومژاوی. ئەگەر دەقەکە پێویستی بە دەستکاریی زمانەوانیی زۆر و بنەڕەتی هەبێت ، ئەوا لەلایەن دەستەی نووسەرانەوە دەستبەجێ ڕەتدەکرێتەوە.
٥. میتۆدۆلۆژیای دروست
دیزاینی توێژینەوەکە دەبێت ڕوون، گونجاو و لە ڕووی زانستییەوە بە تەواوی پاساوی هەلبژاردنی هەبێت. پێویستە نووسەران بە ڕوونی وردەکارییەکانی ئامرازەکانی کۆکردنەوەی داتا، کۆمەڵگە و نموونەی توێژینەوە، چوارچێوەی تیۆری، و تەکنیکەکانی شیکردنەوە بخەنە ڕوو. ئەگەر میتۆدۆلۆژیای هەڵبژێردراو ناڕوون بێت، یان کەمکوڕی بنەڕەتی تێدابێت، یان بەس نەبێت بۆ پشتگیریکردنی دەرئەنجامەکانی توێژینەوەکە، ئەوا بابەتەکە بۆ هەڵسەنگێنەرانی زانستی نانێردرێت.
تەرخانکردنی کات بۆ ڕێکخستنی شێوازی توێژینەوەکە و پێداچوونەوەی زمانەوانیی ورد پێش ناردنی، ڕێگری دەکات لە دواکەوتنی بەڕێوەبردنی کاروباری کارگێڕیی ناپێویست.
دەستەی نووسەران
گۆڤاری زانکۆ بۆ زانستە مرۆڤایەتییەکان
